من العايدين ياحلوين وكل عام وانتم بخير
سنين راحت ...
وعيد ورا عيد حبيبي ما قاني نوم حبيبي وادني قيت
كل عيد وفلّته ووناسته تقل من سنه لسنه
فطرا ببالي اني اضع بين اعينكم من ذكريات الماضي المدفون <متسحّر مدفون
واول ماطرا ببالي تحرّك المشاعر الجياشه باستقبال خبر التهنئه
وانت توّك بزرن وش حلاتك واكبر ما فيك راسك
ويطلع لك ماجد الشبل مدري العيسى ويذيع في القناه الاولى ان العيد <يجيك شعور ولا شعور سعيد العويران يوم جاب الهدف على بلجيكا
ويطلع ابو نوره ويغرد من العايدين من الفايزين انشاء الله
هههههههههههه
وتبدا مشاريع الطفوله
مابين شماغ وعقال مايلبس الا في السنه مرتين <عيد الفطر والاضحى هههه
وكل شيء جديد في جديد وتلميع حذيان اعزكم الله
يعني حاجه فضيعتن فريدتن
وبعد كل ذا تبدا المشاعر الداخليه وتحس انك من قو الفرحه حسراااااااااان
وبالملعنه يجيك النوم
وتقوم الفجر وتوضي وتصلي الفجر
وبعد الصلاه جمعه عائليه رومنسيه جدا جدا
مابين تقبيل راس الوالد والوالد وتعاديهم وتاخذ فنجال وتتغصب لك ثلاث تمرات <مشكله اللي يقلد ابوه
وتاخذ شور سريع جدا جدا جدا
وتلبس ملابس العيد
وتروح للمسجد ...طبعا وانت رايح للمسجد ما تاخذ حذيانك معك عشان ما تنسرق <سياسة طفووله
ههههه
وتصلي ويخلصون من الصلاه وتمر على عمتك زااكيه
وتسلم عليها وتعايدها ...
وبعدها تتوجه الى البيت الكبير
البيت الابيض الكونقرس انفركشن
وتسلم على ابوك مره ثانيه <من قو الوناسه
وتسلم على جدك وعمانك وكل ابو اللي تعرفهم وتقعد عاقل وش حليلك
الين يناديك جدّك ((الله يحفظه))
ويناديني باسم الدلع (وسللليم)
يعني سليمان هههههه
وانت تروح بكل برائه وتسوي انك ماتدري وش السالفه
وتعطيه ذيكك القبله اللي ما تطلع منك الا عند الضروره
ويمد لك عشرة ريال وانت بكل حياء تغض نظرك لوهله بسيطه ثم تعيد النظر بطرف عينك فتاخذها بسلاسه <يقال انه مستحي ومتشهي
وتخلص من جدك الى عمك ومن عمك الى عمك اللي جنب عمك ومن عمك اللي جنب عمك الى عمك اللي جنب ...الخ
ومن مجلس الرجال الى مجلس النساء وتسوّي انك الولد البريء اللي يدور امه
ودّور على اقرب وحده من الموجودات تعايدك باي شيء طبعا انا مادخلت الا وانا حاط حلاو البقر بين عيوووني
ومن بيت جدي الى البقاله ومن البقاله الى بيت جدي
ومن قو الطناخه تصرف العشرات ريالات عشان تكثر <اوووم طموح البزران
وشوفلك شروخ
وشوف لك ثياب محرّقه
وشوف لك اصابات وحروق
على طاري الاصابات
هذا واحد من بزارين الحااااره اسمه سلطان
وكان يلعب معنا شروووخ ...وسلطان كان اثرم مدري التغ المهم انه بدل ما يقول السلام عليكم يقول السلام عليتم <الحمد لله وصلت الفكره
المهم والمسكين انفقع بيده الشرخ وقعد يصيح وجاه ابوه وقال له يا سلطان اي اصبع يعوّرك
وسلطان قال تلّها (اي كلّها)
فضحك الجميع ضحكا شديدا
واذا وصلت الساعه عشر الى عشر ونص تقعد على باب بيتكم
تعبان طفران خلصت شروخك وتقعد تناظر لعيال عمتك هيا وهم يلعبون بشروخهم <الكلاب ما يلعبون الا اذا خلصت شروخنا
ويا حلوك من ايام
امّا الحين فتغيرت الاحوال
وصرت بدل ما تدور الشروخ
تدور حفلات رابح و وينك يا جوازي
هذا ما فيه جعبتي من كلام وهذره ومصاله على الصبح
ننتظر مصالتكم وهذرتكم وجعبتكم وكلامكم ها هنا
واللهم اني صايم
Hitskin.com
